തീര്ച്ചയായും നമസ്കാരം സത്യവിശ്വാസികള്ക്ക് സമയം നിര്ണയിക്കപ്പെട്ട ഒരു നിര്ബന്ധബാധ്യതയാകുന്നു. [അദ്ധ്യായം 4 നിസാഅ് 103]
സഹനവും നമസ്കാരവും മുഖേന (അല്ലാഹുവിന്റെ) സഹായം തേടുക. അത് (നമസ്കാരം) ഭക്തന്മാരല്ലാത്തവര്ക്ക് വലിയ (പ്രയാസമുള്ള) കാര്യം തന്നെയാകുന്നു. [അദ്ധ്യായം 2 ബഖറ 45]
ദൈവസാമീപ്യവും ദൈവപ്രീതിയും നേടി ഇഹപരവിജയങ്ങള് കൈവരിക്കാന് അല്ലാഹു മുസ്ലിംകള്ക്ക് നിയമമാക്കിയ ആരാധനകളുടെ (ഇബാദത്ത്) കൂട്ടത്തില് ഏറ്റവും ശ്രേഷ്ഠമായതാണ് നമസ്കാരം. അത് ഇസ്ലാമിക ജീവിതത്തിന്റെ മുഖ്യസ്തംഭവും മുസ്ലിമിന്റെ സത്വപ്രകാശനവുമാണ്.
ഒരു മനുഷ്യനും ശിര്ക്കിനുമിടയില് (മറ്റൊരു റിപ്പോര്ട്ടില് കുഫ്റിനുമിടയില്) നമസ്കാരമുപേക്ഷിക്കല് മാത്രമേയുള്ളൂ എന്ന പ്രവാചകവചനം അതിന്റെ അനിവാര്യതയും സര്വ പ്രാധാന്യവും വ്യക്തമാക്കുന്നു. ഇത്രയും മഹത്തായ ഈ ഇബാദത്ത് വെറും ചടങ്ങും ഔപചാരികമായ അനുഷ്ഠാനവും അല്ല; ആയിക്കൂടാ. അതില് ഭൗതികവും ആത്മീയവും വ്യക്തിപരവും സാമൂഹികവും പ്രത്യക്ഷവും പരോക്ഷവുമായ നിരവധി അര്ഥതലങ്ങളും ഉദ്ദേശങ്ങളും പ്രയോജനങ്ങളും അന്തര്ലീനമായിരിക്കുന്നു.
കടപ്പാട് : ശബാബ് വാരിക
